Kajsa Balto ja
Sámi juovllat
Operas

Klassihkalaš ja iežan ráhkaduvvon

Skábmamánu 30. b. Kajsa ja su čuojaheaddjit bovdejit Operai konseartaeahkedii, maid guhká beassat muittašit. Guldaleaddjit besset lahka guldalit klassihkalaš juovlasálmmaid, mat leat jorgaluvvon sámegillii, árbevirolaš sámi juovlalávlagiid ja vel Kajsa iežas, ođđa juovlahelmmožiid. Dákkár juovlakonsearta ii leamaš ovdal, gos sámegiella ja sámi árbevierut buktet ođđa dovddu oahpes ja ráhkis šuoŋaide. Eahket addá saji jurddašallamii, oktasaš vásáhusaide ja juovlaráfái huššas áiggis ovdal juovllaid.

Kajsa Balto lea dán áigge Norgga musihkkalávddiid okta mávssoleamoš jienain, ja sus almmustuvvá juovlalávlla «Hávski lea eanan»  golggotmánu 17. beaivve. Dakka maŋŋá, skábmamánu 7. b. ilbmá jagi čábbámus juovlaskearru «Sámi juovllat Operas», mas leat mielde Kajsa Balto ja KORK.

Sihke Opera konsearta ja ođđa juovlaskearru leat mávssolaš lasáhusat juovlamusihka máŋggabealatvuhtii, ja nu mo diibmá bođii ovdan medias Opera konseartta oktavuođas; «ii dárbbaš máhttit sámegiela, vai dán konsearttas fidnešii albma juovladovddu».

- Mun lean áŋgirit ovddidan dán prošeavtta go lean háliidan guldaleddjiide fállat eanet juovlaárbevieruid ja juovlamusihka sámegillii. Lean ieš váillahan ahte livčče eanet sámegiel juovlakonsearttat ja juovlamusihkka, sihke dovddus juovlalávlagat ja ođđa juovlalávlagat. Mun ja mu čuojaheaddjit buktit juovlailu vuosttaš šuoŋa rájes, lohpida Kajsa Balto.

Sámi juovlamárkanat

Ovdal konseartta, dii 12 rájes, geahččit besset maid vásihit alladását sámi dujiid Opera foajes, go dalle lágidit sámi juovlamárkaniid. Nu geahččit ožžot sámevásáhusaid miehtá beaivvi, máŋgga suorggis. Márkanii beassá konseartabileahta haga maid.

Boađe don maid guldalit Kajsa Balto šuoŋaid ovdal juovllaid, lea vásáhus maid guhká beasat muittašit.

Kajsa Balto og Kork: O helga natt (NRK)

Jul med Kringkastingsorkestret (NRK)