Sámi Juovllat
– Samisk jul

Šaddá vuosttaš sámi juovlakonsearta ovttas Norgga stuorámus lávddiin. Lea nappo mávssolaš historjjálaš dáhpáhus.

– Konsearta lea stuorámus prošeakta, mainna dássážii lean bargan. Go Kringkastingsorkesteret lea mielde, de loktana sámi juovlamusihkka ođđa musikálalaš dássái máŋgga láhkai. Mun nu illudan! láhttesta Kajsa Balto.

Kajsa Balto lea maŋimuš jagiid beaggán hearkkes lávlumiinnis ja erenoamáš gaskkustanvugiinis. 2021 son almmustahtii juovlaálbuma «Sámi juovllat», mii lea mávssolaš dan dáfus ahte dat viiddida juovlamusihka máŋggadáfotvuođa. Das leat áidnalunddot čoakkáldahkan klassihkalaš juovlasálmmat, mat leat jorgaluvvon sámegillii, árbevirolaš sámi juovlalávlagat ja ođđa, ieš ráhkaduvvon juovlabearralat.

– Mun lean áŋgirit ovddidan dán prošeavtta go háliidan guldaleddjiide fállat eanet juovladovdduid ja juovlamusihka sámegillii. Lean ieš máŋggaid jagiid váillahan ahte livčče eanet sámi juovlakonsearttat ja erenoamážit sámegiel juovlamusihkka, sihke dovddus juovlalávlagat ja ođđa lávlagat. Nuba mun ja KORK buktit dál juovladovddu guldaleddjiide vuosttaš šuoŋa rájes, čilge Kajsa Balto, ja lasihastá:

– Sávan ahte vuosttaš sámi juovlakonsearta Operas buktá ollu buori boahtteáigái maiddái konseartaeahkeda maŋŋá. Vásáhus soaitá eallit viidáseappot nu ahte sámi perspektiivvat álkibut fátmmastuvvojit mielde buot oktavuođain. Dat nannešii álbmogiid gaskasaš áddejumi ja oktiigullevašvuođa.